morocco history in urdu

Morocco History In Urdu Documentary Morocco Hindi Information Marrakesh Ki Tareekh

Morocco History In Urdu Documentary Morocco Movie In Hindi Marrakesh Ki Tareekh Aur Maloomat

Morocco yani marrakesh ke bare mein hai is mein aap jaan sakain ge marakish ki tareekh, marrakech ke bare mein dilchasp haqaiq aur ye bhi ke kis tarah pakistan aur pakistani passport ne morocco ki azadi ki tehreek mein madad ki aur ye mulk dunya ke naqshay par aik naya mulk ban kar ubhra.

Morocco Information In Urdu

Ye dunya kitni pyari hai ye kainaat kitni wasi hai ye pahar kitnay buland hain ye janglaat kitnay ghanay hain ye samandar kitnay gehre hain ye wadiyan kitni sar sabz hain ye sehra din mein kitnay garm hain aur raat mein kitnay sard hain. Qudrat ke aisay beshumar haseen nazaray aur ye sehra marakish mein bhi paye jatay hain. Aaiye aaj marakish chalte hain.

Marakesh shumali africa ka aik mulk hai jo khubsurat sahilon, sar sabz zar khez zameen, sehraon aur barf se dhakay paharon se saja hua hai.

Rait Bhi Safar Karti Hai Sehra Mein Insanon Ki Tarah…

Donon Ki Manzilain Waqt Ke Sath Badal Jati Hain…

Mujhe marakish mein aye hue teesra din tha aur marakish ke sahara registan mein ye mera pehla din tha jahan urti hoi sehrai rait ne mera istaqbal kiya. Rait aur zindagi donon aik jesi hoti hain donon hi insan ke hath se nikal jati hain zindagi ke jitnay bhi din hotay hain unhain khoob jee laina chahiye isi liye main is raitlay alaqay mein apni zindagi ke khuch lamhe jeenay pohancha tha.

Main is sehra mein akeela nahin tha door daraz ke shehron aur mulkon se bhi log is azeem sehra ki sair ke liye aye hue thay. Saiyahon ke liye idhar behtareen intzam hai, yahan oont sawari bhi ki ja sakti hai aur agar koi is sehra mein raat theharna chahe tou us ke liye yahan camp bhi mojood hain.

Sehra e sahara ka shumar dunya ke azeem tareen sehraon mein hota hai jahan lakhon muraba km ke alaqay mein sirf rait urti dikhai deti hai lekin ye aik hairat angez baat hai ke kabhi isi weran sehra mein dunya ki sub se bari jheel hua karti thi. Sahara ke alaqay mein taza pani ki sub se bari jheel aaj se mehz 1000 saal pehle mojood thi aur ye taqreeban 3,60,000 muraba km ke wasi o areez raqbay par muheet thi.

Jheel azeem chad kehlanay wala pani ka ye bara zakheera 3 afreeki mulkon Chad, Nigeria aur Cameroon par muheet tha aur aaj bhi is ki baqiat 355 muraba km ki aik jheel ki surat mein baqi hain. Ye jheel sirf chand so saal ke arsay mein tabkheer ke amal se bukharat mein tabdeel hoi aur phir hamesha ke liye khatam ho gayi.

Aaj yehi alaqa wasi o areez rait ke maidanon par mushtamil hai aur yahan se urnay wali rait hawa ke raylon ke sath hazaron km ka fasla tay kar ke janoobi amreeca mein amazon janglaat tak pohanchti hai aur in janglaat ki zarkheezi ka baes banti hai. Lakhon muraba km par pheelay amazon ke ghanay janglaat ki zarkheezi ke liye qudrat ne ajeeb o ghareeb intzaam kar rakha hai. Sahara sehra se urne wali rait behr e oqyanoos ke oper se guzar kar in janglaat mein aati hai aur apne sath nabataat ke liye zaroori ghazai ajza bhi laati hai jo hazaron saal se is la mutnahi jungle ko zindagi de rahi hai.

Marrakech maghribi sahara ke is alaqay par malkiyat ka dawaydar hai is se pehle ye alaqa spain ke qabzay mein tha is par 1975 mein marrakesh ne qabza kar liya jo ab tak barqarar hai isi wajah se ye pura alaqa mutnaza hai par marrakesh isay apna janoobi sooba qarar deta hai. Marrakech 175402 muraba meel yani 4 lakh 46550 muraba km ke raqbay par pheela hua hai is lihaz se Marrakech dunya ka 57 sub se bara mulk hai. Mashriq mein Marrakech ki sarhad Algazair, shumal mein bahira room aur Spain se munsalik aabi sarhad aur maghrib mein behr-e-aqyanoos mojood hai. Marakesh ka darul hukumat Rabat hai aur is ka sub se bara shehar aur bari bandargah Kasabalanka hai.

Interesting Morocco Facts In Urdu Marrakech Dilchasp Maloomat

1 – Morocco ke bare mein khuch dilchasp haqaiq ki baat ki jaye tou morocco raqbay ke lihaz se amreeci rayasat california jitna bara hai.

2 – Agar aap marakesh mein street dancer ya saparay ki tasweer utartay hain tou is ke liye woh aap se paise mangtay hain agar aap qeemat ada nahin karte tou woh aap ko mushkil mein daal sakte hain.

3 – Yahan aap ko aik jagah se dusri jagah safar karne ke liye taxi aram se mil jati hai aur kafi sasti bhi hai jis ki qeemat taqreeban 20 moroccan dirham yani 2 amreecan dollar yani 200 pakistani rupon ke qareeb hoti hai.

4 – Dunya bhar mein dil mohabbat ki nishani samjha jata hai par aap ye jaan kar hairan hon ge ke morocco mein jigar ko mohabbat ki elamat samjha hai.

5 – Aap ne azeem saiyah ibn e batuta ka naam tou suna ho ga woh marrakesh mein hi paida hue thay.

6 – Yahan ke log masalay dar khanay pasand karte hain jabkeh yahan podeenay ki chai bohat zayada pasand ki jati hai.

7 – Agar aap is mulk ki sair ke liye ayain tou aap yahan ki bohat si galiyan aur ghar dekh kar hairan reh jayain ge yahan beshumar galiyon aur gharon par aap ko neela aur safaid rang o roghan nazar aye ga jo na sirf ankhon ko thandak faraham karay ga balkeh aap ko ye bhi bataye ga ke marakish ki tehzeeb o saqafat kitni benazir hai.

Morocco History In Urdu – Marrakesh Ki Azadi Mein Pakistani Passport Ka Role

1912 se 1944 tak Marrakesh par France qabaz raha taham hazaron Marrakashi logon ki qurbaniyon ke natijay mein 1956 mein Marrakesh ne France se azadi hasil ki. Azadi ki tehreek mein Pakistan ne bhi Marrakesh ka bharpur sath diya is ki aik misal ye hai keh 1952 mein aqwam e mutehda ki general assembly ke ijlas ke moqa par Marrakesh ke Shah Muhammad Panjam ki taraf se bheejay hue tehreek e azadi ke sar garam leader Ahmad Abdul Salam security counsil mein jub Marrakesh ki azadi ke haq mein awaz buland karne ke liye kharay hue tou wahan mojood France ke numainde ne Ahmad Abdul Salam ko ye keh kar khitab karne se rok diya keh “Marrakesh chunkeh France ki colony hai lihaza Ahmed Abdul Salam ko is platform se bolne ki ijazat nahin”.

Ijlas mein Pakistan ke pehle wazir e kharja Sir Zafarullah Khan bhi shareek thay, unhon ne Ahmad Abdul Salam ko Pakistan ki shehriyat ki pasihkash ki aur raat gaye new york mein qaim Pakistani sifarat khana khulwa kar unhain Pakistani passport jari kiya. Is tarah aglay rooz unhon ne Pakistani chair se general assembly ke ijlas se khitab kar ke marakash ki France se azadi ke haq mein awaz buland ki jis se marakash ki azadi ki tehreek mein nayi ruh parri aur akhir kaar 19 november 1956 ko Marakesh, France se azad hua. Ahmad Abdus Salam aaj dunya mein nahin magar woh jub tak wazir e azam ke mansab par faiz rahe, unhon ne apne daftar mein Pakistani passport ki copy aweezan rakhi, woh apne daftar mein anay wale har shakhs ko pakistani passport dikhatay hue bare fakhar se batatay thay keh “Marakesh ki azadi ki tehreek mein Pakistan aur Pakistani passport ne un ki bari madad ki.” shayed yehi wajah hai keh Turkey ke baad Marakesh woh mulk hai jahan ke log Pakistaniyon se bohat mohabbat o aqeedat rakhte hain.

Marakesh aur Pakistan mein tareekhi aitbar se bhi mumaslat payi jhati hai 711 eswien mein jub naujawan sipah salar Tariq Bin Ziyad apni kashtiyan jala kar fatah ka elan kar raha tha usi doran aik aur naujawan Muhammad Bin Qasim bar e sagheer mein deebal ke muqaam par fatah ka parchan garh raha tha jis ke nateejay mein bar e sagheer mein Islam bheela aur kayi sadiyon tak Musalmanon ne Hindustan par hukamrani ki.

Morocco Weather In Urdu Marrakesh Ka Mausam In Hindi

Marrakesh ka mausam bahira room ke zair e asar hai jo marrakesh ke androoni alaqon mein shidat ikhtyar kar jata hai. Mausam e garma june se august ke akhir tak rehta hai jo garam aur khushk hota hai jabkeh mausam e sarma november se march tak rehta hai jo qadray thanda aur bheega hota hai jis mein shamain aur ratain intihai thandi rehti hain.

Marrakesh ke azeem sehra mein aye hue mujhe 2 ghantay beet chukay thay. Rafta rafta suraj kainaat ke nazaron se aur meri nazron se ojhal ho gaya par us ki sunehri kirnain ab bhi kahin se sehra ki rait ko sonay ke rang mein rang rahi thien. Youn lag raha tha jese ye sehra nahin sonay ki koi tasawarati wadi ho. Chand ki lamhon mein ufaq ke paar suraj pura doob gaya aur raat apne sadiyon purane sathiyon chand aur sitaron ko sath liye sehra ke asman se jhankne lagi. Youn registani garam hawa ke thapayre sard hawa ke jhonkon mein badal gaye.

Maine raat sehra ke camp mein hi guzarne ka faisla kiya camp mein bohat si lamtainain aur 2 kursiyan bhi thien unhi mein se aik kursi par baitha main sehra ki raat ka nazara karta raha.

Sehra ki dhalti raatain bari sehar angez hoti hai yahan asman se hamain jhanktay hue taray shehri alaqon se kahin zayada chamakdar nazar atay hain. Youn lagta hai jese hum sehra mein nahin arbon kharbon chamaktay hue sitaron ke samandar par mojood hon. Sehra ki raat na sirf sard thi balkeh pur sakoon bhi thi. Itni pur sakoon ke mere dil mein aik sawal jaag utha Hum shehri log shehron ke shor sharabay ki zindagi mein najanay kis tarah jee laitay hain. Raat aur sitaron ke is pur sakoon sanaton bharay kheel ko dekhte hue pata hi nahin chala kab falaq par subah ki halki gulabi kirnain mujhe Salam keh rahi thien.

Sehra mein subah hotay hi garam hawain laut aati hai is liye maine usi waqt is azeem sehra ko alwida kehne ka faisla kiya. Raat bhar urti hoi rait ki wajah se maine apne kapron ko jhara aur ye sochtay hue marrakesh ke sehra se rawana ho gaya ke is rait se is mitti se sari zindagi hum insan khud ko bachanay mein lage rehte hain magar aik din yehi rait yehi mitti humain khud main mila kar mitti kar deti hai aur tab na hum khud ko is se bacha patay hain aur na hi ye rait ye mitti humain khud se juda kar pati hai. Main sehra ki rait par apne qadmon ke nishan chortay hue agey barhta raha aur urti hoi rait tez hawaon ke sath mere qadmon ke nisahn mitati rahi. Sach hai sub mitti ho jata hai har nishan mit jata hai nahin mit’ta tou bas ek yehi naam Allah.

اس خبر پر اپنی رائے کا اظہار کریں

اپنا تبصرہ بھیجیں