dilchasp o ajeeb

Dilchasp Maloomat Achanak Sare Insan Duniya Se Ghayeb Ho Jayain Tou

Dilchasp Maloomat Achanak Sare Insan Duniya Se Ghayeb Ho Jayain Tou Kya Ho Sakta Hai?

Aaj ka ye article bare hi dilchasp maloomat se bhara hua hai is mein main aap ko batanay ja raha hon ke farz karain agar dunya se achanak insan khatam ho jayain tou kya ho ga? Ye mazmoon parhte hue ye zaroor ghoor karain ke insan ke khatam ho janay se insan ki banai hoi cheezain khatam hoti hain ya ye zameen khatam hoti hai jo insan ne nahin banai.

Kya zameen hamare baghair reh paye gi? Hum insanon ne zameen ki khubsurati tabah kar ke rakh di hai haqeeqat ye hai keh jis sayare par hum reh rahe hain ye zameen hamare baghair zayada achi rahe gi. Ye tasawar ke insan zameen se achanak khatam ho jayain ye chahe kitna hi khofnak aur afsoosnak kyun na lagta ho lekin zameen insan ke baghair zayada behtar maqaam ho gi. Agar insan achanak zameen se ghaib ho jayain tou kya ho ga? kesi tabahi aa sakti hai? kya khuch badal kar reh jaye ga?
Jin shehron mein reh kar hum insan apni zindagi jeetay hain ye dunya ke shehar insan ke baghair kaisa nazara pasih kar rahe hon ge?

1 – Dunya mein insan ki ghair mojoodgi mein kya bijli ka nazam chal raha ho ga aur agar chal raha ho ga tou dunya mein kab tak bijli rahe gi?

2 – Hamari zameen par basay hue shehron ki ratain chand sitaron se saji hoi tou hain par insan ke khatam ho janay se hamari is zameen par raat ka manzar kya ho sakta hai kya hamare is sayare par ratain bilkul hi andheri hon gi ya tab bhi roshniyan raton ke andhere kam karain gi?

3 – Insan ne apni aur is zameen ki tabahi ke liye aitomi hathyar tou banaye hain par agar insan in atomi hathyaron ke chalnay se pehle hi insan khatam ho jayain tou insan ke banaye hue atomi plants kya chalte rahain ge ya tabah ho jayain ge aur agar tabah ho jayain ge tou is se kesi tabahi pheelay gi?

4 – Satellites yani masnoi sayare jinhain insan khala mein bhej chuka hai un ka kya banay ga kya woh insan ke baghair hi khala mein hamesha ke liye reh payain ge agar nahin reh payain ge tou woh masnoi sayare kahan jayain ge?

5 – Kya insanon ke khatam hone se Samandari hayat bhi khatam ho jaye gi kya machliyan samandar aur daryaon mein aur nehron mein us waqt bhi tair rahi hon gi?

6 – Insan ki tayar karda intihai mazboot aur unchi unchi emaraton bhi is zameen par mojood hain insan ke khatam ho jane ke baad in emaraton ka kya bane ga kya ye bhi bachain gi ya ye bhi khatam ho jayain gi.

7 – Is waqt dunya ke khuch aisay shehar bhi hain jis mein insan ne beshumar paisa laga rakha hai dunya ke in ameer sheharon mein Las Vegas aur Dubai bhi atay hain. Agar insan achanak khatam ho jatay hain tou in shehron ka naseeb kya ho ga kya ye mehngey aur buland o bala emaraton wale shehar rehti dunya tak apni isi halat mein reh payain ge kya in shehron mein tameer hone wali emaraton aur gharon ki jagah koi aur chez lay lay gi agar ye shehar bilkul hi mit jayain ge tou in ki jagah yahan kya ho ga?

8 – Aap ne ahram e misr dekha ho ga agar dekha dekha tou is ke bare mein suna tou zaroor ho ga. Agar insan khatam ho jatay hain tou kya ahram e misr ka wajood baqi rah sake ga?

9 – Insanon ke khatam ho janay se jahan insan ki banai hoi bohat se chezain khatam ho jayain gi wahin insan ki banai hoi sadiyon purani aik tareekhi diwar jisay log deewaar e cheen ke naam se jantay hain kya ye tareekhi deewar e cheen hamari is zameen par mojood rahe gi ya ye bhi khatam ho jaye gi.

10 – Insanon ke achanak khatam ho jane ke 25 saal baad insanon ki banai hoi sarkon ka manzar kya ho ga kya ye sarkain mojood rahain gi agar nahin rahain gi tou in sarkon ki jagah kya ho ga aur in sarkon ka nazara badal janay se dunya kya se kya ban jaye gi?

11 – Insanon ke khatam ho janay ke 300 saal baad kya ho sakta hai aur 600 saal baad zameen par parinday mojood hon ge ya nahin. 10 million saal baad yani 1 crore saal baad hamari ye zameen kis halat mein ho gi? 1 crore saal baad dunya ke 7 ajaibaat mein se kon se baqi bachain ge aur kya Taj Mahal bhi bach paye ga ya ye bhi tabah ho kar khatam ho jaye ga?

12 – Insan ke achanak khatam ho jane ke 30 million saal baad kya zameen par bani nu insan ke wajood ka surakh mil sake ga?

13 – 300 million saal baad yani 30 crore saal baad yani 3000 lack saal baad janwar zameen par apna wajood rakhte hon ge ya nahin?

14 – Aur kya hum insanon ke bina ye zameen baqi reh sakti hai?

15 – Aiye aisay hi dilchasp aur in sub tasawarati sawalon ke dilchasop tasawarati jawabaat talash karne ki koshish karte hain.

Agar Dunya Se Insan Achanak Ghayeb Ho Jayain Tou Kya Ho Ga?

Khuch Ghanton Baad

Khuch hi ghanton baad dunya bhar mein bijli taqreeban tamam hi maqamaat par band ho jaye gi siwaye un maqamaat ke jo hydroelectric stationon se chalte hain kyun keh unhain band honay mein zayada waqt lage ga aur solar panels bhi tab tak kaam karain ge jub tak un par itni dhool na ho jaye jo un ko nakara bana de. Aik andazay ke mutabiq 4 gram fee muraba meter rait ya mitti solar panel ki karkardgi ko 40% tak kam kar deti hai. Magar aik din in solar panels aur hydroelectric stationon se bhi bijli band ho jaye gi aur dekhte hi dekhte puri dunya mein andhera cha jaye ga. Puri dunya mein andhera hotay hi asman par chamaktay hue sitaray zameen se aur zayada roshan nazar anay lagain ge.

Nuclear Power Plants

Agle khuch dinon mein nuclear power plants safety mode par chalay jayain ge.

3 Din Baad

3 din baad dunya bhar mein bohat se zair e zameen railway stations pani se bhar jayain ge kyun keh pani ko subways mein dakhil hone se rokne ke liye pump lagaye jatay hain aur bina insan ke ye kaam karna chhor dain ge aur shayed hi ye baat aam logon ko pata ho keh sirf new york mein hi aik din mein 13 million gallon pani nikala jata hai.

10 Din Mein

Woh janwar jo dunya ke chirya gharon mein ya pinjron mein band hain aur paltu janwar bhi ye sub 10 din ke andar bhook aur pani ki kami ki wajah se mar jayain ge. woh janwar jinhain hum khanay ke liye istemal karte hain jesa keh murghi waghera woh bhi mar jayain gi aur woh janwar jo qaid se farar hone mein kamyab ho jayain ge ya tou woh maray jayain ge ya dusre janwaron ko maar dain ge yani zinda bachne ki aik jang ka aghaz ho jaye ga. Chotay kutay aur billiyan woh pehle hon ge jo dusre janwaron ke hathon marain ge jabkeh bare kutay apni toliyan bana lain ge.

1 Maheeney Baad

Aik maheenay baad nuclear power plants tabah hona shuru ho jayain ge kyun keh nuclear power plants ko thanda rakhne ke liye pani ka istemal kiya jata hai ye pani aabi bukharat mein tabdeel ho jaye ga jis se itnay bare dhamakay hon ge jo Chernobyl aur Fokoshima mein bhi nahin hue. Is ke natijay mein lakhon janwar maray jayain ge. Albata zameen majmoi tor par ba asani aur kahin jaldi is aloodgi se chutkara pa lay gi.

1 Saal Baad

Aik saal baad satellite yani masnoi sayarchay aur woh jo khuch bhi hum ne khala mein bheeja hai bilakhir girna shuru ho jaye ga. Asman par tot’tay sitaron jesa manzar ho ga bas dekhne wala koi insan nahin ho ga.

25 Saal Baad

25 saal baad hamari sarkain aur footpath sabzay aur haryali mein dab jayain ge jo is ki teh se ubharte hue in par apna qabza jama lay gi.

30 Saal Baad

30 saal baad hamare baghair hawa kahin zayada saaf ho jaye gi. Dubai aur Las Vegas jese sehrai shehar rait talay dab jayain ge. Fitrat ka dera har jagah ho ga, har us chez par jo hum ne banai hai.

100 Saal Mein

100 saal ke arsay mein bohat se dam, Italy ka tower of pisa, sydney ka opera house aur agra ka taj mahal tot chukay hon ge.

150 Saal Baad

150 saal baad bohat si sarkain jo insanon ke khatam ho jane ke 25 saal baad sabzay aur haryali mein tabdeel ho chuki thien ab woh nehron aur daryaon ka manzar paish karne lagain gi.

300 Saal Baad

300 saal baad eiffel tower gir jaye ga. Sanfransisco ka mashoor golden gate pul bhi tabah ho jaye ga. Har woh chez jo folaad se bani hai purzay purzay ho jaye gi kyun keh un emaraton aur tameerat ki hifazat aur dekh bhaal ke liye koi insan sadiyon se mojood nahin is liye ye zang lagne se khatam ho jayain gi.

400 Saal Baad

400 saal baad daldali alaqay bahal ho jayain ge aur un par parindon ka raaj ho ga.

450 Saal Baad

450 saal baad Insan ke baghair behri zindagi bhi khoob phalay phulay gi machliyon khas tor par whale machliyon ki abadi kayi guna barh chuki ho gi.

500 Saal Baad

500 saal baad kisi jadeed shehar ka naam o nishan baqi nahin bachay ga. Shehar janglaat ka manzar paish karne lagain ge aur jangli janwar un mein ghoom phir rahe hon ge.

600 Saal Baad

Insanon ke khatam ho jane ke 600 saal baad dunya ke qudrati nazaray mein na sirf izafa ho chuka ho ga balkeh shehron ke ghaib ho janay, nayi jheelon ke namudar hone se bhi zameen aur khubsurat ho chuki ho gi. Siwaye sehraon ke har taraf haryali hi haryani ho gi. Daryaon, samandaron aur jheelon ke kinaron par parinday hi parinday hon ge.

10,000 Saal Baad

10,000 saal baad zameen par dunya ke 7 ajaibaat aur insanon ki akhri nishaniyon mein se sirf woh patharon ki tameerat reh jayain gi jo insan ne banai jese keh ahram e misr ya diwar e cheen.

30 Million Saal Baad

30 million saal baad ab zameen pehle se kahin zayada sar sabz ho gi parindon ki tadad bhi kafi tayada barh chuki ho gi.

50 Million Saal Baad

50 million saal baad ab zameen par insan ki wahid nishani sirf plastic ki botlain aur sheeshon ke tukray reh gaye hain.

100 Million Saal Baad

100 million saal baad bil akhir plastic ki botlon aur sheeshay ke tukron ka bhi khatma ho gaya.

300 Million Saal Baad

300 million saal baad yani 30 crore saal baad yani 3000 lack saal baad is zameen par hamari koi nishani ab baqi nahin bachi. Agar koi aur makhlooq is moqa par hamare sayare par aati hai tou unhain maloom bhi nahin ho ga keh hum insan bhi kabhi yahan mojood thay.

Hamain apne wajood ko jari rakhne ke liye zameen ki zaroorat hai magar zameen ko apne wajood ko jari rakhne ke liye hamari zaroorat nahin hai.

Ye dilchasp o ajeeb article parhne ka shukriya agar aap ko ye pasand aya tou in dilchasp maloomat ke is mazmoon ke link ko apne social networks par zaroor share karain.

اس خبر پر اپنی رائے کا اظہار کریں

اپنا تبصرہ بھیجیں